En Marea presenta unha batería de propostas para garantir o sistema público das pensións entre as que o voceiro, Luís Villares, destaca que é preciso reformar o mercado laboral, subir o salario mínimo interprofesional e a pensión mínima aos 1.000 euros, un sistema tributario “xusto” que priorice o ben común por riba do beneficio das empresas e un maior control da fraude fiscal.

Galicia é a segunda comunidade autónoma coas pensións máis baixas do Estado, con 740 euros de media e mesmo os xubilados de Lugo e Ourense teñen unha renda mensual que non acada os 700 euros. Villares lembra que o gasto destinado neste concepto ao PIB en España é dos máis baixos de Europa, o que converte as nosas prestacións nunha das máis baixas do continente. As causas desta situación son, segundo apunta Villares, “o sistema tributario inxusto e a precariedade laboral”.

“Temos a cuarta comunidade autónoma cos peores salarios e onde a súa recuperación é a máis lenta e precaria” xa que o 89% do traballo creado dende 2014 é precario e ten unha media dun 30% menos de salario asociado. A isto hai que sumarlle a temporalidade, que causa circunstancias como que “en Galicia para que unha persoa traballe un ano enteiro ten que encadenar de media 11 contratos”, sinalou Villares. Ademais, a clase traballadora galega padece a maior taxa de mortalidade laboral en relación á meda estatal.

Outro dos factores da “ineficiencia” do sistema actual é que “as grandes empresas durante o periodo desta mal chamada crise económica, que foi un recorte de dereitos encubertos, levou a que pasasen de tributar arredor dun 30% a un 16% de impostos”. Así, explica Villares, “prodúcese un maior beneficio das compañías en detrimento dunha maior recadación tributaria que nos afasta do concepto de xustiza tributaria, cando está garantido no artigo 31 da Constitución”.

Para asegurar a continuidade do sistema público de pensións En Marea propón entre outras medidas, a derrogación da reforma laboral e a suba do salario mínimo interprofesional e a pensión mínima ata os 1.000 euros. Luís Villares tamén apunta que se debe eliminar o factor de sostenibilidade porque “supón un grande perxuízo patrimonial” e que se cumpra o artigo 50 da Constitución vinculando a suba das pensións ao custo da vida. Dende En Marea reclámase tamén unha rebaixa da idade da xubilación para promover o acceso da xente nova ao traballo e a calidade de vida das persoas que rematan a súa carreira laboral, a fin do copago farmacéutico, o pleno funcionamento da lei de dependencia e asegurar o acceso da terceira idade a unha vivenda digna. Doutra banda, é preciso rematar cos beneficios fiscais dos que gozan as grandes fortunas, como as SICAV, e investir na investigación contra a fraude fiscal.

Villares fai un chamamento para que a cidadanía se una ás mobilizacións promovidas polos pensionistas porque supón “a defensa dunha xeración que loitou por traer a democracia e os dereitos sociais e que agora loita por ter unha vida digna”. O voceiro de En Marea engade que “o sistema de pensións é un modelo de civilización, de benestar social por riba dos beneficios das empresas, un sistema solidario das traballadoras con quen xa non traballa, interxeracional e interclasista”.

Asi, concluíu Villares, o Plenario que En Marea celebra o vindeiro sábado 17 de marzo en Santiago de Compostela interrumpirase ás 12.00h para que as asistentes poidan acudir á concentración convocada na Praza de Cervantes.