En Marea responsabiliza á Xunta do conflito sanitario de Ourense e pídelle ao conselleiro que escoite a persoal e usuarios

Estás aquí: Inicio » En Marea responsabiliza á Xunta do conflito sanitario de Ourense e pídelle ao conselleiro que escoite a persoal e usuarios

En Marea responsabiliza á Xunta do conflito sanitario de Ourense e pídelle ao conselleiro que escoite a persoal e usuarios

A deputada e voceira de Sanidade de En Marea Eva Solla mantivo esta mañá unha reunión coa Xunta de Persoal do Hospital Universitario de Ourense (CHUO), na que recolleu multitude de necesidades e problemas, coma a redución de camas estruturais e persoal, un día despois de que miles de persoas se concentraran por esta situación chegando a esixir a dimisión de Feijóo.

“Tras unha semana de peches e recollidas de máis de 13.000 sinaturas, estas protestas seguen sen ter ningún reflexo en medidas da Xunta de Galicia”, denunciou a parlamentaria de En Marea, que cualificou de “vergoña que tras anos de espera por un novo hospital teñamos unha zona nova do hospital con 55 camas menos das que tiña que ter”. E engadiu que “o que queremos é que se dote dunha vez por todas as camas que impidan que situacións de amoreamento no servizo de Urxencias con máis de vinte persoas compartindo un baño deixen de acontecer”.

A Xunta de Persoal tamén deu traslado doutras deficiencias relacionadas coa ausencia de persoal suficiente nos servizos de limpeza e mantemento, que tamén se sumaban esta maña ás protestas diante do centro hospitalario. “Sabiamos de antemán que cando se privatizaba e se lle daba este servizo a Ferrovial isto ía acontecer, pero parécenos unha vergoña que a estas alturas teñan que estar os traballadores nestas condicións e sobre todo as familias das persoas que continúan amoreadas nos servizos de Urxencias porque a Xunta non toma ningunha medida”, sinalou Solla.

En Marea reclámalle á Xunta e ao conselleiro de Sanidade que escoite os traballadores e traballadoras deste centro e trasladará todas estas demandas ao Parlamento. A parlamentaria de En Marea tamén se referiu nas súas declaracións aos problemas na cociña do Complexo Hospitalario de Ourense (CHUO). “Non hai persoal para todos os servizos centrais e para reforzar estas saturacións que vivimos estes días, tendo que elaborar mil menús por quenda”, explicou, “unha situación totalmente insostible baixo unhas condicións laborais que xa teñen denunciado en inspección laboral, mentres seguimos agardando que a Xunta licite unha cociña nova para o centro”.

“Non sabemos que fixeron os cidadáns e cidadás de Ourense para merecer este trato por parte da consellería de Sanidade”, apuntou Eva Solla, antes de anunciar que En Marea rexistrará hoxe mesmo iniciativas parlamentarias como proposicións non de lei e preguntas que recollan as demandas dos traballadores para poñer fin a unha situación que “é de xustiza que se resolva”.

Deixa unha resposta

O teu enderezo electrónico non se publicará Os campos obrigatorios están marcados con *

sixteen − fourteen =

X