En Marea reclama á Xunta que regule a instalación de parques eólicos tendo en conta a repercusión real a nivel paisaxístico, patrimonial, medio ambiental e económico

Estás aquí: Inicio » En Marea reclama á Xunta que regule a instalación de parques eólicos tendo en conta a repercusión real a nivel paisaxístico, patrimonial, medio ambiental e económico

En Marea reclama á Xunta que regule a instalación de parques eólicos tendo en conta a repercusión real a nivel paisaxístico, patrimonial, medio ambiental e económico

O grupo de En Marea reclamou á Xunta de Galicia a elaboración dunha serie de regras para a instalación de novos parques eólicos que teñan en conta a repercusión real tanto a nivel paisaxísticos, patrimonial e medio ambiente como a nivel económico. Os deputados Francisco Casal e Antón Sánchez ofreceron unha rolda de prensa esta mañá no Parlamento de Galicia na que denunciaron a ausencia total dun plan eólico no noso país por parte do Goberno galego.

O deputado Francisco Casal salientou que “despois do absoluto fracaso anterior da Xunta de Galicia no sector eólico” amosou unha total abandono de funcións que deixa en mans das poxas do Ministerio de Industria e nas empresas a elección dos lugares onde instalar os novos parques eólicos. “Os megavatios chegan a Galicia pero o fan de xeito desordenado e baixo decisións unicamente dos beneficios das empresas” asegurou o deputado de En Marea.

Para En Marea a xunta debería ter reaccionado de xeito inmediato para desenvolver unhas regras para que estas novas instalacións teñan unha repercusión real na economía do noso país contando cos colectivos sociais, a cidadanía, concellos e todos os axentes implicados. “Se hai vontade poderíase facer de xeito moi rápido pero non se fixo e en consecuencia abre barra libre a instalación destas empresas na que unicamente elas saen beneficiadas” declarou Francisco Casal.

Estas regras debería ter en conta elementos fundamentais como respecto dos valores paisaxísticos, patrimoniais e garantir retorno, e dar prioridade a aqueles que potencian a participación dos colectivos e cooperativas locais, e os que aportasen unha porcentaxe ao Goberno da Xunta para garantir de verdade o retorno económico de todas estas instalacións.

Os deputados de En Marea denunciaron ademais que a maioría dos parques non aportarán un so euro aos concellos onde se instalen máis alá dos derivados da construción e instalación do mesmo pero que despois non deixarán un só euro mentres producirán grandes beneficios. Así mesmo, a creación de emprego non irá máis alá da construción dos mesmos e será realizada de xeito maioritario por empresas de fora o mesmo que o posterior mantemento.

O vicevoceiro de En Marea no Parlamento, Antón Sánchez, asegurou que esta é a primeira mostra da aplicación da Lei de depredación de Galicia no sector eólico na que os trámites redúcense á metade prexudicando de xeito grave á participación da cidadanía. “O eólico debería ser unha base para o desenrolo futuro de Galicia pero o debate debería ser eólico para quen e como. O que nos di o PP é eólico para unhas poucas empresas de fora de Galicia e sen ter en conta as consecuencias a nivel paisaxístico, patrimonial e medio ambiental” denunciou Sánchez.

O enorme potencial eólico de Galicia que debería ter sido orientado a producir un desenvolvemento con retorno social, algo que non foi senón todo o contrario. O viceportavoz no Parlamento defendeu así mesmo que “non se poden instalar en todos os sitios” aclarando que as horas de vento é o único limitante establecido a día de hoxe. “As directrices da paisaxe están paralizadas desde 2016. Que se pretende? que cando estean instalados estes eólicos estas directrices xa non teñan volta atrás ao non existir retroactividade” preguntou Antón Sánchez.

Por todo isto, o grupo de En Marea reclama unha revisión do plan sectorial eólico unha vez se aproben as directrices paisaxísticas que inclúan todas estas directrices. “Están a pagar por enriba da vontade dos veciños e veciñas ao declarar de interese público cando a instalación dos mesmos non está a deixar beneficios e si impactos. Róubannos recursos, territorio e provocan impactos no noso país. Estamos dunha estafa xeneralizada” concluíu Antón Sánchez.

Deixa unha resposta

O teu enderezo electrónico non se publicará Os campos obrigatorios están marcados con *

4 × three =

X