Unanimidade perante a proposta de En Marea de esixirlle ao Goberno do Estado un incremento das frecuencias e axuste de horarios no servizo ferroviario A Coruña-Vigo

Estás aquí: Inicio » Unanimidade perante a proposta de En Marea de esixirlle ao Goberno do Estado un incremento das frecuencias e axuste de horarios no servizo ferroviario A Coruña-Vigo

Unanimidade perante a proposta de En Marea de esixirlle ao Goberno do Estado un incremento das frecuencias e axuste de horarios no servizo ferroviario A Coruña-Vigo

A iniciativa de En Marea de esixirlle ao Goberno do Estado un incremento das frecuencias e axuste de horarios do Eixo Atlántico ferroviario A Coruña-Vigo, trasladada esta tarde á Comisión 2ª de Ordenación Territorial, Obras Públicas, Medio Ambiente e Servizos, logrou o acordo unánime da Cámara.

“Non é racional que despois de facer un investimento tan importante se dea un servizo de baixa calidade por non axustar os horarios ás necesidades reais da liña”, sinalou o deputado Marcos Cal durante a súa intervención para defender a iniciativa, na que tamén lembrou que o transporte de proximidade en Galicia leva anos desmantelándose, perante a pasividade da administración autonómica.

A posta en marcha do Eixo Atlántico, que conecta unha área que concentra máis da metade da poboación de Galicia, supuxo un incremento do uso do tren en detrimento do vehículo privado. “Pero naceu cunha serie de carencias coma a falta de persoal, os prezos demasiado elevados ou a escaseza de horarios e frecuencias, que nos trae hoxe aquí e que continúan sen ser solventados”, engadiu Cal antes de indicar que o problema de chegar á estación e atopar o cartel de completo é practicamente diario.

A iniciativa de En Marea, aprobada tras aceptar unha emenda do Grupo Popular, insta á Xunta que lle demande ao Goberno do Estado incrementar as frecuencias e axustar os horarios do Eixo Atlántico ferroviario A Coruña-Vigo ao ritmo que as demandas e as necesidades dos cidadáns o requiran (o texto en cursiva correspóndese coa emenda do PP).

Seguiremos traballando por un tren social, adaptado ás necesidades da cidadanía e 100% público”, concluíu o parlamentario de En Marea.

Rescate da AP9

En Marea tamén volveu trasladar á Cámara o rescate para o público da Autoestrada AP9, agora para solicitarlle á Xunta que no prazo de tres meses elabore un estudo da viabilidade do rescate desta infraestrutura para o público, “contemplando o seu custe económico, o valor económico do rescate por parte da Xunta, o seu impacto tarifario para o público e as alternativas para o seu financiamento”.

O vicevoceiro de En Marea Antón Sánchez denunciou a actitude do PP, “que veta a transferencia da AP9 porque sabe que en Madrid non ten a maioría suficiente que lle permita protexer o negocio da empresa privada a quen xa antes lle regalou a infraestrutura, que está obtendo 45 millóns de euros anuais de beneficio neto”.

Deixa unha resposta

O teu enderezo electrónico non se publicará Os campos obrigatorios están marcados con *

twenty − seven =

X