O PP impide no Parlamento a pretensión de En Marea de centrar o pleno na xestión dos lumes

Estás aquí: Inicio » O PP impide no Parlamento a pretensión de En Marea de centrar o pleno na xestión dos lumes

O PP impide no Parlamento a pretensión de En Marea de centrar o pleno na xestión dos lumes

Santalices retíralle a palabra a Paula Quinteiro, que rexeitou a pretensión do PP de darlle a este pleno “unha falsa apariencia de normalidade”

Estes días caracterizáronse por vermos un Goberno da Xunta desaparecido e totalmente incapaz, e amosouse unha vez máis que só o pobo é quen de salvar o pobo”. Así comezaba a deputada Paula Quinteiro a súa intervención no debate da Proposición de Lei de corresponsabilidade parental no cese da convivencia, punto co que comezou a sesión plenaria no Parlamento de Galicia trala negativa do PP de alterar a orde do día, ante a petición dos tres grupos da oposición de comparecencia de Feijóo para dar conta da xestión da vaga de incendios.

A deputada de En Marea sinalou que “non debemos extender o apagón informativo que houbo nas radios e teles públicas a esta Cámara” e rexeitou a pretensión do PP de darlle á sesión plenaria unha “apariencia de normalidade que non é tal, pois o pobo falou onte na rúa e hoxe aquí deberiamos estar falando única e exclusivamente da situación de emerxencia que vive este país, das políticas que impidan que se repita no futuro unha situación semellante e das responsabilidades políticas que se deben depurar.

Pero o PP non quere escoitar os millerios de persoas que onte sinalaron aos culpables e as politicas que están detrás desta traxedia, prefire obvialo”, reiterou Paula Quinteiro durante a súa intervención. “Queremos manifestar o noso máis profundo respecto ás persoas que promoven a iniciciativa lexislativa da custodia compartida, debate no que En Marea leva traballando moito tempo, pero consideramos que hoxe a prioridade é falar da vaga de incendios e da súa pésima xestión.”

O presidente do Parlamento, Miguel Ángel Santalices, retiroulle a palabra á parlamentaria de En Marea tras chamala á cuestión en tres ocasións. Os deputados de En Marea farán o mesmo en todas e cada unha das intervencións durante esta xornada en sinal de protesta pola “falsa normalidade” que pretende impoñer o PP coa súa maioría absoluta e facendo oídos xordos “á voz do pobo”.

Deixa unha resposta

O teu enderezo electrónico non se publicará Os campos obrigatorios están marcados con *

13 + thirteen =

X