En Marea reclama á Xunta unha aposta decidida polo sector da madeira con especial impulso ao proceso de transformación

Estás aquí: Inicio » En Marea reclama á Xunta unha aposta decidida polo sector da madeira con especial impulso ao proceso de transformación

En Marea reclama á Xunta unha aposta decidida polo sector da madeira con especial impulso ao proceso de transformación

O voceiro de En Marea, Luís Villares, xunto co deputado Francisco Casal e a concelleira de Móvete, Mar Blanco, mantiveron unha xuntanza co tecido socioeconómico da Estrada para coñecer de primeira man a situación. O voceiro de En Marea, Luís Villares, afirmou ao remate da reunión que “Galicia é un país rico que está empobrecido porque está mal xestionado”. Como proba disto sinalou por unha banda a vaga de lumes e en segundo lugar o acusado e continuo descenso da poboación no noso pais, dous problemas ante os que para En Marea é necesario dúas cousas. Por una banda, o mantemento dos servizos esenciais dentro do territorio para acabar co despoboamento no rural e na vilas medias, ao tempo que se fomenta un emprego de calidade nestes lugares reforzando os sectores produtivos nos que cada comarca sexa punteira. No caso concreto da Estrada, Villares destacou a combinación da transformación da madeira co sector primario que ten unha grande potencialidade. Neste sentido salientou que pese a ser produtores do 40 por cento da madeira de todo o Estado no relativo á transformación a cifra baixa ata o 6 por cento.

Na xuntanza o sector do moble trasladou a súa preocupación polo feito de que non se está a producir madeira de calidade para o que o voceiro de En Marea fixo un chamamento á reflexión sobre a ordenación forestal que permita dar calidade a madeira e sobre todo que permita transformala o que daría un valor engadido a nosa terra. Isto suporía un investimento en I+D+I para levar a cabo este proceso de transformación e tamén un investimento en formación para mozos e mozas a través dunha Formación Profesional que permitira a súa posterior inserción neste sector.

Villares defendeu tamén a necesidade de ter un aproveitamento multifuncional do monte. “A solución fronte ao eucalipto pasa por plantar outras especies que dean maior valor engadido tanto para o sector do moble como para o sector agrícola” asegurou o voceiro de En Marea.

A concelleira de Móvete Mar Blanco puxo o foco na perda continuada de poboación neste municipio o que fai que se estea achegando de xeito preocupante a barreira dos 20.000 habitantes coas consecuencias de poder deixar un concello de primeira categoría. No relativo ao tecido económico empresarial a concelleira de Móvete denunciou a súa debilidade a pesar de que existan empresas que estean a funcionar ben. Denunciou tamén a precarización laboral e a baixa renda per capita neste Concello polo que salientou a importancia de coñecer os problemas do tecido socioeconómico estradense para tratar de chegar a solucións para conseguir reverter esta situación.

O grupo de En Marea comprometeuse co sector a levar ao Parlamento diversas propostas orientadas a poñer en valor da cadea da madeira fomentando que a transformación se faga íntegra no noso terreo, e por outro lugar a dotación dos servizos necesarios para que a xente non teña que marchar do lugar onde vive.

Deixa unha resposta

O teu enderezo electrónico non se publicará Os campos obrigatorios están marcados con *

one × one =

X