En Marea propón crear unha Comisión de estudo con expertos independentes para un gran pacto de territorio contra o lume

Estás aquí: Inicio » En Marea propón crear unha Comisión de estudo con expertos independentes para un gran pacto de territorio contra o lume

En Marea propón crear unha Comisión de estudo con expertos independentes para un gran pacto de territorio contra o lume

Luís Villares: “Pedímoslle ao PP altura de miras para deixar de lado os intereses partidistas e planificar políticas a 20 ou 30 anos, pois xa ningúen se fía de Feijóo”

Na comparecencia posterior á Xunta de Voceiros Luís Villares destacou a solicitude por parte de En Marea (conxuntamente co PsdeG) de crear unha Comisión técnica de estudo constituída por expertos independentes que avalíen as causas dos incendios e acheguen solucións estruturais. “Danse as condicións idóneas para que volva darse unha vaga de lumes, polo abandono do medio rural”, lembrou Villares, que lle pediu “responsabilidade e altura de miras” ao PP. “Agardemos que non volvan chegar tarde, e deixen de lado intereses curtopracistas electorais, pois despois do acontecido coa xestión dos incendios”, dixo o voceiro de En Marea, “xa ninguén se fía de Feijóo”.

Villares destacou o privilexio de contar en Galicia con multitude de profesionais independentes e expertos na materia “aos que debemos recurrir para deseñar propostas políticas de país a vinte ou trinta anos vista”. “Sabemos que Feijóo virá dar excusas ao Parlamento no vindeiro pleno, pero os milleiros de persoas que sufriron as consecuncias da súa incompetencia xa non traga coas súas desculpas” dixo Luís Villares e engadiu que dende En Marea “estamos dispostos a dialogar na busca de solucións, pero sen deixar pasar un día máis”.

Con este obxectivo, En Marea propón un gran Pacto nacional polo territorio que garanta un rural vivo “que a xente poida habitar con dignidade”, que afronte o cambio climático de xeito transversal tendo en conta que as secas non son estacionais e que incorpore una nova política forestal dende a perspectiva da multifuncionalidade do monte. Ademais, “hai que afrontar unha nova política agrogandeira que recupere os terreos agrícolas abandonados ou transformados de xeito infame en grandes eucaliptais que agora ameazan a vida das persoas”. Finalmente terá que deseñar unha mellor transición entre o territorio urbano e periurbano corrixindo erros que “permitiron que o lume chegase dende o monte ao centro das cidades”.

A “nefasta” xestión dos lumes por parte do goberno de Feijóo estará moi presente no vindeiro pleno, e protagonizará a pregunta que Luís Villares lle formulará ao presidente da Xunta durante a sesión. Pero á orde do día o grupo parlamentario En Marea tamén traslada “cuestións fundamentais para o benestar da poboación” como son unha moción de cara a lograr melloras no sistema educativo ou as preguntas ao goberno polas obras no centro de saúde de Mugardos e o futuro do persoal de Conservas Calvo en Esteiro (Muros).

Ademais, En Marea proporá na vindeira sesión plenaria “dar carpetazo definitivo ao proxecto da mina de Touro” e a restitución das estatuas do Pórtico da Gloria en mans da familia Franco para o patrimonio público.

Deixa unha resposta

O teu enderezo electrónico non se publicará Os campos obrigatorios están marcados con *

five × 3 =

X