En Marea presenta alegacións para mellorar a RISGA aínda que defenderá un cambio de modelo cara unha renda social inclusiva

Estás aquí: Inicio » En Marea presenta alegacións para mellorar a RISGA aínda que defenderá un cambio de modelo cara unha renda social inclusiva

En Marea presenta alegacións para mellorar a RISGA aínda que defenderá un cambio de modelo cara unha renda social inclusiva

O actual modelo de RISGA non garante a inclusión das persoas en risco pobreza e exclusión, chega a moi pouca xente e as contías son escasas, polo que non permiten unha vida digna.

A precariedade das políticas de inclusión da Xunta levou aos concellos do cambio a desenvolver políticas de rendas sociais municipais que palían situacións ás que a Xunta non chega, pero o Goberno galego non pode eludir a súa responsabilidade para con estas persoas.

Para a publicación deste proxecto de Decreto faltou un proceso participativo coas asociacións e persoal técnico de Servizos Sociais, tanto da Consellería coma dos Concellos, o que tería mellorado o texto e facilitaría a súa aplicación. Non é tarde para abrir este proceso antes da publicación definitiva do Decreto, e iso propoñemos novamente á Xunta dende En Marea.

En Marea defende, no inmediato (independentemente de outros debates e obxectivos máis ambiciosos de cambio de modelo social), un modelo de renda mínima, asimilable a unha renda social, que se configure como unha prestación garantida de dereito subxectivo e vinculada á carencia de rendas e/ou ingresos mínimos de subsistencia, buscando a promoción da persoa e o seu empoderamento e autonomía persoal, superando a actual RISGA no sentido de non vincular a renda só á exclusión, senón tamén á realidade do empobrecemento, sendo unha prestación garantida e non condicionada. Así mesmo, ampliaríase a cobertura das actuais RISGA e AIS, axilizaríase a xestión e a inclusión social e a vivir con dignidade entenderíase plenamente coma un dereito. En cambio, o presente proxecto de Decreto afonda no carácter condicionado desta renda e mantén as contías da prestación. Hai que ter en conta, ademais, que a crise deixa novos perfís de risco de exclusión social e que o emprego non garante saír da pobreza, e o mesmo sucede con prestacións económicas como as pensións, en moitos casos, insuficientes. Ademais, continúase excluíndo desta prestación social básica ao colectivo migrante en situación de irregularidade administrativa.

A mellora dos sistemas de protección social en Galicia é unha necesidade inmediata dado o afondamento das desigualdades que trouxo a crise e o mantemento dunha pobreza e precariedade laboral estrutural, chegando a taxa de risco de pobreza e exclusión en 2016 a un 25,4%, segundo a Enquisa de Condicións de Vida da Familias. Pola contra, o investimento na función orzamentaria de exclusión social non acada a media europea (0,2% do PIB galego e ratio de 30,23 €/hab fronte o 0,4% de gasto medio da UE).

Deixa unha resposta

O teu enderezo electrónico non se publicará Os campos obrigatorios están marcados con *

nine + 6 =

X