En Marea pide a declaración urxente de BIC para o museo Carlos Maside en Sada

Estás aquí: Inicio » En Marea pide a declaración urxente de BIC para o museo Carlos Maside en Sada

En Marea pide a declaración urxente de BIC para o museo Carlos Maside en Sada

Preme arriba para escoitar as declaracións de Benito Portela, alcalde de Sada, e de Ánxeles Cuña, deputada de En Marea sobre o Museo Carlos Maside

Santiago, 15 de decembro de 2017.- Ánxeles Cuña, Luca Chao, Antón Sánchez, deputadas de En Marea no Parlamento de Galicia máis Miguel Anxo Fernán Vello, no Congreso,  xunto co alcalde de Sada, Benito Portela, pediron hoxe nas inmediacións do Museo Carlos Maside, en Sada, a declaración urxente de BIC para o complexo do Castro no que está incluído o museo Carlos Maside de arte contemporánea.

Este museo leva pechado desde o ano 2012 e a conservación actual do edificio, ideado polo arquitecto coruñés Andrés Fernández-Albalat, ofrece series dúbidas sobre o estado en que se encontran algunhas pezas artísticas da colección. En Marea tiña intención de visitar o interior do museo que leva o nome do pintor Carlos Maside, pero a empresa da que depende este museo denegou o permiso para acceder ás súas instalacións.

O Concello de Sada leva reclamando a declaración de BIC para o complexo formado polo museo e máis pola fábrica de cerámica do Castro, que forman un conxunto que ten valor arquitectónico propio, ademais do valor dunha colección artística que reune artistas galegos contemporáneos e alberga unha parte importante do legado artístico de Luís Seoane. Tanto o alcalde de Sada, como a deputada Ánxeles Cuña Bóveda reclamaron en Sada a declaración urxente de BIC “como medio de protección imprescindible para o conxunto”, segundo declarou Benito Portela.

Ánxeles Cuña sinalou que dar protección ao museo, “tanto ao edificio, como á colección, é render unha homenaxe á xeración de Seoane e ao seu traballo por Galicia”. Ademais da declaración de BIC, En Marea tamén respalda a petición do concello de conseguir un convenio entre a propia administración municipal, a Xunta de Galicia máis a empresa do Castro para que se poida reabrir o museo e se poida dar mantemento ao edificio e conservación ás coleccións.

Tanto Portela como Cuña puxeron de manifesto a súa preocupación polo estado de conservación no que se atopan as obras da colección, entre as que se encontran algunhas pezas únicas para a arte galega.

Deixa unha resposta

O teu enderezo electrónico non se publicará Os campos obrigatorios están marcados con *

fifteen + 2 =

X