En Marea lamenta que despois de non facer nada durante 8 anos para previr o suicidio presenten un plan baleiro de contido, sen recursos nin dotación económica

Estás aquí: Inicio » En Marea lamenta que despois de non facer nada durante 8 anos para previr o suicidio presenten un plan baleiro de contido, sen recursos nin dotación económica

En Marea lamenta que despois de non facer nada durante 8 anos para previr o suicidio presenten un plan baleiro de contido, sen recursos nin dotación económica

Santiago de Compostela, 26 de setembro de 2017.- En Marea lamenta que o Goberno galego despois de tardar oito anos en presentar un plan de prevención do suicidio traia unha proposta incompleta obviando os problemas sociais e económicos, e sen contemplar ningunha dotación económica nin de recursos para poñer en marcha este plan. A vicepresidenta do Parlamento e deputada de En Marea, Eva Solla, salientou que estamos a falar dun grave problema en Galicia como demostran os datos publicados polo Instituto de Medicinal Legal que sitúa a Galicia á cabeza do Estado con 345 suicidios o pasado ano o que supón un incremento do 7 por cento. Fronte a isto, o goberno galego que continúa sen actuar e obvia a realidade e a influencia das condicións de vida das persoas en Galicia o e que “as 700.000 persoas que viven en situación de exclusión social non está relacionado coa taxa de suicidios segundo o Goberno galego?”preguntou a deputada de En Marea.

Eva Solla denunciou a falla de prevención nos plans da Consellería de Sanidade e lamentou que a prevención do suicidio non se trate de xeito transversal con outras consellarías xa que non é só un problema sanitario afondando na idea de que o suicidio está relacionado unicamente con problemas de enfermidade mental.

A ausencia de recursos vinculados a posta en marcha deste plan nin referencia algunha a un incremento de persoal para atender esas necesidades. Así, cargan ao persoal de Atención Primaria estas actuacións, cando están xa en condicións límite ante a total carencia de persoal. Tampouco falan de recursos para psicoloxía, nin tampouco de partidas económicas o que fai pensar que unha vez máis estamos ante un plan baleiro do Goberno galego que non servirá para dar resposta a un problema tan grave no noso país como é o suicidio.

“NON DEAN AS COSTAS Á CIDADANÍA E RETIREN O ANTEPROXECTO DA LEI DA SAÚDE”

Na sesión plenaria da tarde, o grupo de En Marea presentou unha moción na que se volvía a pedir a retirada do anteproxecto de modificación da lei da saúde para non “dar as costas á democracia, á sanidade pública e a todos os galegos e galegas do rural”

Eva Solla considerou indignante que a Xunta continúe a insistir en introducir este proxecto de xeito unilateral. “O goberno intentou colar en pleno verán unha reforma profunda do sistema sanitario, unilateralmente, publicando o anteproxecto o mesmo día que se presentaba aos sindicatos” denunciou. Unha norma que abre a porta á empresa privada, que elimina a participación cidadá que acaba coas áreas sanitarias (Monforte, o Barco, A Mariña, O Salnés). e mesmo que incumpre os principios que deron da Lei xeral da saúde.

A deputada de En Marea explicou as consecuencias de eliminar as áreas sanitarias xa que sinalou “son demarcacións territoriais destinadas a garantir a atención integral de saúde, e dicir, coordinan os recursos para a xente que vive na área, para que funcionen mellor, para que se adapte a realidade da saúde específica dese territorio”. Polo tanto a eliminación das áreas é igual a perda de servizos para á cidadanía en saúde.

A Atención Primaria queda desprovista dunha estrutura administrativa, que lle permita unha negociación unha negociación e que equilibre, quedando relegada a un papel subsidiario. “A dereita leva anos desmantelando a Atención Primaria” afirmou Eva Solla salientando que a xente debe saber que eliminar unha área sanitaria significa que van ter peor atención primaria.

Así mesmo, denunciou o grave recorte da participación, cando o recomendable é apostar pola participación da comunidade imprescindible para atender ao específico de cada área, valorar a diversidade e loitar contar a desigualdade. “Ninguén escoita aos profesionais pero tampouco á cidadanía” afirmou.

O proxecto presentado polo PP “danlle a puntilla á nosa investigación” ao eliminar o plan galego de investigación introducindo un modelo opaco de funcionariado. “Ese é o espírito do anteproxecto: opacidade, desrregulación, e eliminación de dereitos” declarou Eva Solla.

Por iso o grupo de En Marea volveu a pedir que se retire este anteproxecto e que se inicie unha negociación na Mesa sectorial sobre as retribucións e dereitos conxelados do persoal do Sergas. “Recapaciten, non dean as costas á democracia, á descentralización, a todos os galegos e galegas do rural. Retiren a Lei” concluíu a vicepresidenta do Parlamento e deputada de En Marea.

Deixa unha resposta

O teu enderezo electrónico non se publicará Os campos obrigatorios están marcados con *

ten + nine =

X