En Marea insta á Xunta a axilizar o pagamento das axudas por fillo menor de tres anos e a contestar todas as solicitudes

Estás aquí: Inicio » En Marea insta á Xunta a axilizar o pagamento das axudas por fillo menor de tres anos e a contestar todas as solicitudes

En Marea insta á Xunta a axilizar o pagamento das axudas por fillo menor de tres anos e a contestar todas as solicitudes

Centos de familias denuncian atrasos e moitas nin recibiron resposta á súa instancia

O grupo parlamentario En Marea vén de rexistrar no Parlamento de Galicia unha proposición non de lei instando á Xunta a axilizar a resolución da concesión das prestacións económicas de pagamento único por fillas e fillos menores de tres anos en sucesivas convocatorias, reducindo o prazo máximo a 3 meses no ano 2018 e na actual convocatoria de 2017 nun prazo de 30 dias dende a súa concesión. Na iniciativa tamén se propón cambios na orde de axudas de xeito que se estableza a obrigatoriedade dunha resolución expresa para todas as solicitudes presentadas no prazo máximo establecido.

Esta axuda, regulada na Lei de Orzamentos do ano 2017, consiste nun pago de 360 euros pola primeira filla ou fillo, de 1.200 euros pola segunda ou segundo e de 2.400 euros polo terceiro e sucesivos, para aquelas familias, que durante 2015 non estivesen obrigadas a presentar a declaración polo IRPF nin que a presentasen de xeito voluntario, e que a 1 de xaneiro tiveran ao cargo a fillos/as menores de 3 anos.

Moitas familias ás que se lle concedeu a axuda, denuncian que, pasados cinco meses xa do fin do prazo de solicitudes, non se lles informa sobre cando van cobrar ou díselles unha data aproximada que logo non se cumpre e na Consellería de Política Social non se lles fornece información ante as súas peticións.

“Estamos a falar de familias con baixos ingresos, que viven cinco meses coa incertidume de saber se van recibir ou non a axuda”, denuncia a promotora da iniciativa, a deputada Paula V. Verao, que apunta que “en moitos casos, estas familias deixaron de presentar voluntariamente a declaración da renda, que lles podía saír a devolver, por ter unha pequena axuda que, para elas, significa un respaldo para o pago de facturas.”

 

 

Deixa unha resposta

O teu enderezo electrónico non se publicará Os campos obrigatorios están marcados con *

eleven + 3 =

X