En Marea esixirá un plan de choque para evitar que a cinza chegue ás rías e oficinas de información nos concellos afectados

Estás aquí: Inicio » En Marea esixirá un plan de choque para evitar que a cinza chegue ás rías e oficinas de información nos concellos afectados

En Marea esixirá un plan de choque para evitar que a cinza chegue ás rías e oficinas de información nos concellos afectados

O voceiro de En Marea Luís Villares, acompañado da deputada Paula Quinteiro e mailos alcaldes de Salceda de Caselas e Mondariz, Marcos Besada e Xoan Carlos Montes Bugarín, visitaron esta mañá as zonas afectadas polo lume no concello de Salceda de Caselas.

Tralo percorrido pola parroquia de Parderrubias, que quedou en grande medida calcinada polo lume, o voceiro de En Marea anunciou que lle esixirá á Xunta un plan de choque ecolóxico urxente para evitar que agora toda esta cinza chegue a rías, ríos e acuíferos e supoña problemas para a poboacion a efectos de abastecemento.

“Tamén queremos que de xeito inmediato se abra unha vía de coordinación cos concellos para atender as persoas afectadas e queremos que isto se faga no propio territorio, polo que reclamaremos que nos municipios máis afectados a Xunta abra oficinas de información que permita á poboación saber que tipo de indemnizacións haberá e avaliar tamén os danos ocurridos”, sinalou Villares.

“A cidadanía de galicia vive abandono tras abandono e incompetencia tras incompetencia”, sinalou o voceiro de En Marea, que engadiu que esta semana “Feijóo queimou a reputación que lle quedaba” en referencia ao silencio da Xunta “que a día de hoxe aínda non se puxo en contacto cos concellos afectados”.

Pola súa banda o alcalde de Salceda de Caselas, onde arderon 915 hectáreas, Marcos Besada, reclamou un mando único por parte da Xunta para loitar contra o lume “que permita os concellos cos nosos escasos medios a facer fronte ós incendios e unha ordenación do territorio, e que isto sirva como punto de inflexión para que non volva suceder”.

A deputada Paula Quinteiro indicou que dende En Marea xa se están mantendo xuntanzas cos colectivos vinculados ó monte e co representantes municipais para deseñar un cambio de modelo nas políticas forestais, de ordenación do territorio e na loita contra o lume.

Finalmente, o alcalde de Mondaríz, Xoan Carlos Montes Bugarín, denunciou que a día de hoxe aínda non se contase cos alcaldes dos concellos afectados e que “ninguén da Xunta se puxese en contacto con eles nin antes, nin durante nin unha vez extinguidos os lumes”.

Deixa unha resposta

O teu enderezo electrónico non se publicará Os campos obrigatorios están marcados con *

four + 15 =

X