En Marea denuncia o emprego demagóxico do termo “terrorismo incendiario” que a Xunta emprega para agochar a súa incapacidade pero non para aumentar ás contías económicas das indemnizacións

Estás aquí: Inicio » En Marea denuncia o emprego demagóxico do termo “terrorismo incendiario” que a Xunta emprega para agochar a súa incapacidade pero non para aumentar ás contías económicas das indemnizacións

En Marea denuncia o emprego demagóxico do termo “terrorismo incendiario” que a Xunta emprega para agochar a súa incapacidade pero non para aumentar ás contías económicas das indemnizacións

O voceiro de En Marea, Luís Villares, valorou coma “claramente insuficiente” o decreto de axudas publicado pola Xunta de Galicia en relación aos lumes. En primeiro lugar, o grupo de En Marea considera imprescindible que o Goberno galego abrise oficinas nos concellos máis afectados onde a xente puidese informarse e recibir axuda para cubrir todos os trámites. Así mesmo, Villares considerou inxustificado que o prazo para estas axudas se marque nun mes xa que non son de concorrencia competitiva e ademais existen casos sobre danos causados aos bens nos que aínda non están identificados os propietarios xa que non residen alí e polo tanto poderían quedar fora unicamente por non estar identificados neste prazo tan restrinxido dun mes.

No relativos aos danos persoais, En Marea considera non admisible, e así o tivo que recoñecer o propio vicepresidente da Xunta de Galicia, Alfonso Rueda, na súa comparecencia no Parlamento na comisión de Economía e Facenda, que se vinculen os falecementos a unha incendio cunha intencionalidade penal xa que é moi difícil determinar e polo tanto debería ser eliminado inmediatamente esta requisito. Na comparecencia desta mañá o voceiro de En Marea, recriminou ao vicepresidente a utilización demagóxica do termo “terrorismo incendiario” que o goberno galego leva semanas empregando incluso facendo publicacións que costaron 80.000 euros a todos os galegos e galegas falando de terrorismo incendiario. Villares lembrou que a Xunta chegou a anunciar que se elevarían as contías ao se tratar de terrorismo. Agora nos orzamentos o que se recollen son unhas contías que non se corresponden coas previstas na Lei 29/2011 que recolle as indemnizacións por morte en caso de vítimas por actos terroristas. Por este motivo o voceiro de En Marea esixiu á Xunta de Galicia que “non faga demagoxia con algo que causa moita dor ás vítimas co único fin de agochar a súa incapacidade para xestionar esta catástrofe”.

En canto a danos aos bens, para En Marea non parece razoable que para acceder a axudas ao aluguer teñan que estar ao corrente en todas as súas obrigas tributarias, porque poden deixar desprotexidos aos máis débiles.

As axudas aos Concellos son igualmente insuficientes xa que estas axudas deberían dar a capacidade de impulsar e planificar as áreas afectadas xa non só de xeito medio ambiental senón incluso a nivel socio-económico para o que é imprescindible que os concellos podan ter recursos extraordinarios para realizar esta función.

E finalmente, En Marea bota en falla unha instrución dirixida a crear un plan de atención psicolóxica. “Non se deron as instrucións ata o momento para atender o impacto emocional da poboación afectada e os intervenientes nas tarefas de extición, que poden carrexar consecuencias máis graves no medio prazo se se cronifican e non son atendidas agora” denunciou Luís Villares por iso reclama á Xunta de Galicia que atenda esta necesidade.

Deixa unha resposta

O teu enderezo electrónico non se publicará Os campos obrigatorios están marcados con *

three × 5 =

X