En Marea asegura que a creación da Axencia Galega de Industria Forestal evidencia que o PP entende o monte só dende a esfera produtiva e non de maneira multifuncional

Estás aquí: Inicio » En Marea asegura que a creación da Axencia Galega de Industria Forestal evidencia que o PP entende o monte só dende a esfera produtiva e non de maneira multifuncional

En Marea asegura que a creación da Axencia Galega de Industria Forestal evidencia que o PP entende o monte só dende a esfera produtiva e non de maneira multifuncional

O grupo parlamentario de En Marea preguntou en comisión pola escurantista creación da Axencia Galega de Industria Forestal que como salientou a deputada Paula Quinteiro, unha vez máis aproveitan a tramitación da Lei de orzamento de 2017 para incluír unha Lei de medidas fiscais, administrativas e de ordenación, e incorporaron unha disposición adicional onde se falaba da autorización para a creación desta Axencia Galega da Industria Forestal, “de maneira urxente e pola porta de atrás”.

Este xeito de actuar dificulta dunha maneira clara o debate como sinalou a deputada de En Marea xa que o Parlamento non tivo a posibilidade de debater sobre esta cuestión en ningún momento o que foi valorado como moi negativo por parte de En Marea sobre todo cando “estamos ante unha decisión moi importante por que modifica cuestións fundamentais”. “A creación desta Axencia modifica a propia estrutura da consellería de Medio Rural, de feito baleira de contido dunha maneira evidente” explicou Quinteiro o que deixa en evidencia que “a pesar dos discursos contraditorios, o Goberno galego entende o monte só dende a perspectiva forestal e só dende o eido produtivo”.

Para o grupo de En Marea isto supón un “erro de partida que vai imposibilitar unha xestión sustentable e multifuncional do monte”. Fronte a isto, Paula Quinteiro salientou a necesidade de entender o país na súa complexidade e en conxunto, o rural tamén. Por este motivo, defende que Medio rural debería ter un papel fundamental en materia de xestión de política forestal, pero o Consello Reitor desta Axencia conta só con dos vocais dos nove que existen, o que supón unha representación mínima.

“Esta axencia supón pasar por riba dos principios de participación e da democracia asegurou xa que todos os compoñentes do Consello Reitor da Axencia Galega da Industria Forestal son representantes das administracións . Nin representación dos sindicatos nin das entidades medioambientais nin dos colexios profesionais, entre outros” denunciou Paula Quinteiro.

Así mesmo para o grupo de En Marea non se pode desligar a política forestal do conxunto de políticas para o rural. Esta decisión, como sinalou Paula Quinteiro, contradí incluso o propio Decreto 166/2015, do 13 de novembro, polo que se aproba a estrutura orgánica da Consellería do Medio Rural que recolle no seu artigo 1 que nas Competencias da Consellería inclúese entre outras propor e executar as directrices xerais do Goberno no ámbito de industrias forestais e montes.

Coa aprobación e posta en marcha deste novo Decreto a Consellaría do Medio rural queda baleira de contido e de orzamentos para levar adiante unha política de montes, pasando a ser esta Axencia o interlocutor cualificado. Só quedaría nesta Consellaría o Servizo de defensa contra incendios forestais onde os orzamentos xa fican hipotecados dun ano para outro. “A vella idea de que é a industria forestal e da madeira, a que impón a súa política de montes pasa a ser unha realidade de xeito máis claro” declarou a deputada de En Marea.

Por todo isto, En Marea denunciou que a creación deste tipo de axencias dificulta o control público, e pola participación do seu consello reitor queda patente. Esta axencia vai ser a encargada de outorgar e xestionar todas as axudas, agás as de prevención e loita contra os lumes forestais, as axudas relacionadas coa posta en valor dos montes destacou. E con esta decisión, fica nas mans da industria forestal e da madeira o deseño do futuro do monte galego. “Non só disporán das ferramentas de planificación e ordenación, senón que tamén terán o acceso directo aos cartos” alertou Quinteiro o que nos leva ao deseño imposto da industria da madeira e forestal, “un monte só forestalista a través da plantación de especies de crecemento rápido e de cultivos enerxéticos” concluíu.

Deixa unha resposta

O teu enderezo electrónico non se publicará Os campos obrigatorios están marcados con *

twenty + 18 =

X