En Marea acusa ao PP de aprobar unha Lei de acompañamento para beneficiar a economía depredadora

Estás aquí: Inicio » En Marea acusa ao PP de aprobar unha Lei de acompañamento para beneficiar a economía depredadora

En Marea acusa ao PP de aprobar unha Lei de acompañamento para beneficiar a economía depredadora

O vicevoceiro de En Marea, Antón Sánchez, criticou a actitude do Goberno da Xunta de Galicia que esta tarde aprobou unha Lei de Acompañamento co único fin de se saltar as leis que eles mesmos aproban. “Non está ben facerse trampas xogando ao solitario pero é bastante peor facerlle trampas a todos os galegos e galegos con Leis de Acompañamento que só lles valen para facer o que queren e non facer o que se comprometeron a facer” denunciou Sánchez. “Non é unha lei de Acompañamento é a “lei das súas comenencias”. Porque a súa política non responde a ningún tipo de principios e directrices. A súa política é o seu capricho e as súas comenencias” afirmou.

Un paso máis dun goberno baseado na “propaganda para tapar fracasos e incompetencia”. “Panos de fume e confusión. Ruído informativo.
Programas fraudulentos. Orzamentos maquillados. E Lei de Acompañamento como un comodín que o legaliza todo. Unha lei caníbal para paparse o sector público” declarou o vicevoceiro de En Marea.

Antón Sánchez acusou ao Goberno Feijóo de sumar fracasos estrepitosos en ordenación territorial, transporte, nas estratexias de desenvolvemento agrogandeiro, nas políticas de rehabilitación e vivenda. “Eliminan as manchas, facendo un roto. Niso consiste a Lei de Acompañamento” aclarou. En política forestal o resumo da era Feijóo pódese resumir para En Marea cos termos: fracaso e fraude. Tras a vaga de lumes de outubro, anunciaron unha trintena de medidas. A maioría delas, formalmente en vigor. Pero todas incumpridas, ningunha aplicada.

Así, incumpriron a lei de Montes e o Plan Forestal de Galicia de 1992 como consta no informe de fiscalización do Consello de Contas. Fracasaron coas SOFOR a pesar de ser moi duros e arrogantes coa medida pola que optou o bipartito para dar posibilidades para a xestión conxunta do monte. “Dende que vostedes entraron no goberno constituíronse en Galiza 5 SOFOR, cunha superficie de 500 has o que representa aproximadamente o 0,08 por cento da superficie forestal en mans privadas descontando xa a superficie en man común da que despois falaremos” salientou Sánchez.

Acusou así mesmo ao Goberno do PP de permitir a reforestación de terras agrarias cun descenso continuado dunha superficie agraria útil tan necesaria para o desenvolvemento sostible do sector lácteo e o desenvolvemento dunha nova agricultura. Primeiro subvencionando a reforestación. Despois facendo a vista gorda coas reforestacións ilegais entregando o monte ao capital máis voraz. Engordan a industria do lume. Fan negocio da destrución do noso patrimonio natural” asegurou. “Comparados con vostede, Atila era un bendito. Só deixan como legado para as xeracións futuras ruínas e desolación” lamentouse o vicevoceiro de En Marea.

Lamentou así mesmo a actitude da Xunta baseada no baleiro da acción pública negándose a planificar políticas públicas con rigor, con dotación de recursos e pensando na xente e a protección de desenvolvemento dun monte multifuncional, con biodiversidade ambiental e económica. “Vostede promoven subvencións, deducións e exencións fiscais como que bota sangue ao mar para que veñan os tiburóns”. Non tiveron vontade de artellar fórmulas e apoiar que a xente se autoorganizase, lográndoo mediante a xestión conxunta a dinamización do monte como elemento produtivo. Entre gran empresa ou acción cooperativa, o Goberno do PP elixe a gran empresa.

Nesta Lei de acompañamento, as modificacións da lei de montes veciñais de 1989 son tan só para facilitar a declaración de monte en estado de degradación ou abandonado para permitir que acabe en mans privadas como asegurou Sánchez. O plan da Xunta é que moitas destas grandes superficies apetecibles pasen a mans dos que se adican á pasta de papel ou á biomasa.

Pero tamén sinalou que a Lei de acompañamento serve ao Goberno Feijóo para “agochar a súa incompetencia co asunto dos lumes son unha emenda á totalidade ao que fixeron vostedes antes”.
Así, puxo como exemplo a súa chegada ao goberno cando reduciron á metade as distancias de seguridade que fixara o bipartito na lei de prevención de incendios. “Agora modifican a lei para tratar de corrixir o que vostedes mesmos fixeron mal” explicou.

En política rural lamentou tamén a improvisación e o xeito de facer política ás apalpadas. “Seguen a pechar explotacións, envellecen os titulares de explotacións agrarias e vostedes pensan que van a solucionar todo con deducións fiscais. Ese é o conto do impostos cero no rural” asegurou. Mentres debilítanse as Oficinas Agrarias Comarcais que deberían de ser elementos indispensables de transferencia de coñecemento e apoio tanto ás explotacións existentes coma aos que se incorporen á actividade. Redúcese o investimento para a investigación, recortan o cadro de persoal do CIAM e non repoñen efectivos, nin investigadores, nin de persoal non investigador. Sánchez criticou a falla de políticas para a comercialización e transformación de produtos agrarios. “Tiñan un regulamento redactado polo Bipartito para unha marca de garantía de Horta de Galicia e 8 anos despois segue a durmir nun caixón” salientou.

Sánchez referiuse tamén a Lei de rehabilitación, a súa última Lei cleenex, “para usar nunha acción de propaganda e tirar coa que queren tapar ese 15  por cento de execución do ano 2016 do programa de fomento de rehabilitación”. “Van ter que facer a Lei para non facer nada porque para facer o que lles peta a vostede e lles reina aos seus amigos da economía depredativa xa teñen a Lei de Acompañamento” concluíu o vicevoceiro de En Marea.

Deixa unha resposta

O teu enderezo electrónico non se publicará Os campos obrigatorios están marcados con *

twenty − 9 =

X