Manifesto de En Marea ante o 25N

Estás aquí: Inicio » Manifesto de En Marea ante o 25N

Manifesto de En Marea ante o 25N

Desde a Marea Feminista (En Marea) amosamos o noso total e absoluto apoio ás vítimas da violencia machista.

Coa vista posta neste 25 de novembro, iniciamos a campaña #VisibilizandoAsViolencias25N para interpelar á sociedade, e en especial aos homes, sobre a súa responsabilidade no mantemento da desigualdade.

A expresión máis atroz da violencia machista son os asasinatos, pero son so a punta do iceberg: hai moitas condutas, accións, omisións, etc, etc. que tamén son violencia machista.

Nos últimos 15 anos, 885 mulleres foron asasinadas polas súas parellas ou exparellas. O ano pasado, os xulgados galegos recibiron 5683 denuncias por violencia machista. Raro é o día que non hai unha nova sobre algunha agresión, ameaza, vulneración de dereitos… cara as mulleres. Está claro: o machismo mata.

As crianzas tamén son vítimas da violencia machista, xa que a sofren tanto directa como indirectamente, mais en moitos casos, tómanse decisións que deixan aos fillos/as de mulleres vítimas de violencia machista nunha situación de desprotección, vulnerando os seus dereitos, xa que, nos casos de violencia machista, debe primar o interese superior do/a menor, afastandoo/a, nestes casos de quen agrede á súa nai. Cada vez que se agrede á nai dunha crianza esta tamén é agredida.

Para rematar coa violencia machista, desde a marea feminista esiximos:

  • A dotación de recursos reais por parte da administración.
  • O desenvolvemento e o cumprimento de tódolos puntos da Lei 11/2007, de 27 de xullo, Galega para a prevención e o tratamento integral da violencia de xénero e do decreto 182/2004 no relativo ao persoal mínimo esixido (hai CIMs q non contan nin co minimo esixido normativamente, sendo a Xunta coñecedora).
  • Integrar a coeducacion nos centros de ensino (ampliando os contidos mínimos relacionados coa igualdade e a prevención das violencias machistas e incorporando a perspectiva de xénero nos plans de estudo).
  • Formación en igualdade -obrigatoria e especifica- para o conxunto de profesionais implicados e que interveñan no proceso educativo, xudicial, etc. (docentes, xudicatura, forzas de seguridade …).
  • Desenvolver e levar a cabo protocolos de actuación interdepartamental e interinstitucional para a coordinación e mellora das actuacións.

Animamos a todas e todos a participar nos actos que teñen lugar ao longo do país con motivo do 25 de novembro.

1 Comment

  1. Manoel Barbeitos di:

    Fundamental o papel dos medios de comunicación e opinión, públicos e privados. Deben asumir o seu compromiso -no caso dos públicos a súa obriga- de denuncia, crítica e rotunda oposición a violencia de genero. Ademais do seu apoio e defensa das vítimas.

Deixa unha resposta

O teu enderezo electrónico non se publicará Os campos obrigatorios están marcados con *

seven + eighteen =

X