Luís Villares: “O traspaso da xestión de información das autovías galegas á DXT demostra a incapacidade de Feijóo para exercer o autogoberno”

Estás aquí: Inicio » Luís Villares: “O traspaso da xestión de información das autovías galegas á DXT demostra a incapacidade de Feijóo para exercer o autogoberno”

Luís Villares: “O traspaso da xestión de información das autovías galegas á DXT demostra a incapacidade de Feijóo para exercer o autogoberno”

Para En Marea a decisión unilateral da Xunta contradi a posición aprobada no Parlamento de reclamar as transferencias completas de tránsito e seguridade viaria.

Esta mañá antes de dar comezo á visita á Feira de Industrias Culturais CULTURGAL, o voceiro de En Marea Luís Villares referiuse en declaracións á prensa á cesión da xestión dos paneis informativos das autovías galegas por parte da Xunta á Dirección Xeral de Tráfico. “Para En Marea esta recentralización de servizos realizada voluntariamente pola Xunta de Galicia é unha renuncia inexplicable ás facultades de autogoberno e denota a incapacidade da Xunta de Galicia para xestionar os recursos propios da autonomía”, criticou con dureza.

Para En Marea esta posición política é contraria á posición do pleno do Parlamento de Galicia de 8 abril de 2008 que reclamou ao Estado as transferencias completas en materia de tránsito e seguridade viaria. “O goberno, ebrio da súa maioría absoluta, esqueceu traer ao Parlamento un convenio que contradi a posición política da Cámara, o que constitúe en si unha práctica pouco lexítima en termos democráticos, toda vez que a vontade da cidadanía se pronunciou en sentido contrario”, engadiu Villares á entrada do Pazo da Cultura de Pontevedra.

“O convenio que vén de presentarse é o colofón dunha serie de fracasos do Goberno de Núñez Feijoo en materia de infraestruturas”, sinalou o voceiro de En Marea, para quen “a irrelevancia política do presidente da Xunta impediulle levantar o veto do seu partido á transferencia da AP 9, logo impediulle presionar para que as peaxes non sigan sangrando á poboación galega e a nosa economía mediante subas abusivas como a do 3,1% prevista para o ano que vén, e agora atopámonos con que non é capaz nin de xestionar uns paneis informativos”.

Paneis que agora quedarán en mans dunha autoridade estatal que non foi capaz de prever que levar unha autovía polo alto do Fiouco (Mondoñedo) implicaría a súa inutilidade durante a metade dos días do ano. “Non, o goberno central non ten mellores nin maiores habilidades para xestionar o tránsito viario que unha autoridade galega. Pero para iso fai falla, iso si, vontade e fortaleza política, xusto o que Feijoo non ten. A maioría absoluta máis inútil da democracia”, concluíu.

 

Deixa unha resposta

O teu enderezo electrónico non se publicará Os campos obrigatorios están marcados con *

18 − nine =

X