Luís Villares reclamará esta semana en Bruxelas a inclusión de Galicia no corredor ferroviario atlántico

Estás aquí: Inicio » Luís Villares reclamará esta semana en Bruxelas a inclusión de Galicia no corredor ferroviario atlántico

Luís Villares reclamará esta semana en Bruxelas a inclusión de Galicia no corredor ferroviario atlántico

Para En Marea a debilidade política de Feijóo deixa a Galicia no “furgón de cola” en canto a financiamento autonómico e infraestruturas

O voceiro de En Marea Luís Villares viaxará mañá a Bruxelas para reclamar a inclusión de Galicia no Corredor Atlántico da Rede Transeuropea de ferrocaril de mercadorías, tras anunciar Fomento que a retrasa polo menos ata 2027. “Esta decisión demostra o fracaso da negociación de Feijóo na súa coalición con Asturias e Castela e León”, denunciou Villares, que a considera “gravemente lesiva para a competitividade dos portos galegos”.

Hai que sacar unllas e dentes para que teñamos unha saída directa a Europa pola vía cantábrica, sen ter que baixar a Oporto”, reivindicou o voceiro de En Marea, que “para suplir a incapacidade do presidente da Xunta” se reunirá mañá coa presidenta do grupo da esquerda unitaria do Parlamento Europeo, Gabriele Zimmer e posteriormente, na xornada do mércores, fará extensiva a reclamación ao conxunto do grupo para que se “reabran as negociacións para a modificación do regulamento da UE de 2013 que fixaba as escalas do corredor sen pasar por Galicia”. 

Financiamento autonómico

Para En Marea a debilidade política de Feijóo estanos privando aos galegos e galegas dun novo modelo de financiamento autonómico que nos permita ter máis recursos para resolver graves problemas coma a emigración da mocidade, o problema estrutural de emprego ou o desequilibrio territorial. “A revisión á alza do cupo vasco demostra que cando lle interesa ao PP, as negociacións prodúcense con rapidez”, sinalou Luís Villares lembrando que Feijóo se comprometeu no Parlamento de Galicia a contar cun novo modelo de financiamento para Galicia a finais de 2017, “pero nin está nin se lle espera”.

Existen máis recursos ca antes, algo que En Marea xa demostrou nesta Cámara o ano pasado, o que significa que a fase alcista nos pemirtiría ter máis recursos” engadiu o voceiro de En Marea antes de reclamarlle ao PP un sistema de financiamento baseado en tres piares: na soberanía fiscal, na suficiencia de recursos (en Marea demanda un incremento de 2.500 millóns de euros nas partidas destinadas a Galicia) e no principio de cooperación e solidariedade neste “gran patio de veciños que é o Estado e a Unión Europea”.

Aumento das peaxes na AP9

Outra das consecuencias da debilidade política de Feijóo é, segundo En Marea, o incremento nun 3.1% nas peaxes da AP9 anunciadas por Audasa para o vindeiro ano “un absoluto disparatte con prezos abusivos para usuarios e que impide a vertebración do tráfico rodado de mercadorías, cando o Estado debería de poñerse do lado da cidadanía e non dunha empresa que opera en réxime de monopolio coa súa complicidade”.

Estase condenando aos nosos produtos a maiores custes de produción restándolles competitividade”, indicou Luís Villares, que reiterou a petición do traspaso da titularidade da AP9 do Estado a Galicia e o seu rescate para o público. “A empresa está repartindo 45 millóns de euros en dividendos sobre unha facturación de 145 millóns anuais”, engadiu, “un beneficio desorbitado a costa dos galegos, que non viron incrementados os salarios nesa proporción”.

Deixa unha resposta

O teu enderezo electrónico non se publicará Os campos obrigatorios están marcados con *

fourteen − eleven =

X