Luís Villares reclama no Parlamento Europeo o corredor ferroviario atlántico para Galicia

Estás aquí: Inicio » Luís Villares reclama no Parlamento Europeo o corredor ferroviario atlántico para Galicia

Luís Villares reclama no Parlamento Europeo o corredor ferroviario atlántico para Galicia

O voceiro de En Marea, Luís Villares, explicou na sede do Parlamento Europeo en Bruxelas algunhas das reclamacións que En Marea formula para Galicia: as de carácter político sobre a recuperación dos dereitos sociais e as liberdades perdidas durante a crise e pola aplicacións de políticas da dereita europea e española; e os proxectos concretos para impedir o illamento de Galicia ou que quede en situación de inferioridade fronte a outras comunidades.

Villares reclamou tres actuaciones básicas que desde Europa deben poñerse en marcha. A primeira delas é o corredor atlántico ferroviario, unha necesidade posta de manifesto por toda a sociedade galega e que ten que evitar o illamento de Galicia e dos seus portos no transporte de mercancías. Villares defendeu diante dos deputados da esquera europea unha urxente decisión neste sentido, toda vez que o goberno español aprazou a decisión para 2027 “unha data que deixará fóra da competetividade aos portos galegos e con eles a unha grandísima parte das empresas galegas”. Luís Villares apuntou na súa intervención que esta era unha infraestrutura estratéxica para Galicia e que será chave do desenvolvimento do país.

A segunda das reivindicacións explicadas por Villares diante dos eurodeputados ten que ver cos incendios que arrasaron Portugal e Galicia durante os últimos meses. A posta en marcha dun operativo de emerxencia para dar resposta a situacións de urxencia como os incendios foi matizada polo voceiro de En Marea coa solicitude de que ese organismo que se porá en marcha teña un mando operativo sobre o terreo e non que sexa dirixido desde a distancia. Villares apuntou que a idea de que este organismo sexa dirixido desde Bruxelas, por exemplo, “deixa aberta a porta para que se volvan dar casos de caos e desorganización como os vividos en Galicia o mes pasado”. O que precisamos, segundo Villares “é un mando operativo que se faga desde o lugar no que sucede a emerxencia, non tería sentido padecer un incendio en Galicia e que as decisións se tomasen en Bruxelas ou en Madrid”. Diante dos deputados europeos, Villares defendeu tamén avanzar moito máis nos casos de Portugal e Galicia e “poñer en marcha un pacto polo territorio para que se poidan previr os incendios tendo un territorio coidado e organizado”.

Neste último sentido, Villares explicou aos deputados que para ter un territorio coidado en Galicia é “necesario que non se perda a súa capacidade de produción alimentaria”. O voceiro de En Marea pediu que “Europa lexisle a favor dos produtos alimentarios de calidade”. “Galicia non pode competir en cantidades, pero pode competir en calidade alimentaria, Europa debe protexer esta produción non só porque lle conveña a Galicia senón porque ese debe ser o modelo europeo, un modelo no que prime a calidade dos alimentos e tamén a súa trazabilidade, neste sentido Galicia ofrece moitas ventaxas”.

Villares tamén se referiu na súa intervención á situación da esquerda en Europa asegurando que En Marea “naceu para responder ao que a xente pedía: unidade e defensa dos dereitos da cidadanía”. O voceiro explicou que para a En Marea “é necesario un novo proceso constituínte que teña dous piares fundamentais: o recoñecemento do carácter plurinacional e a consecuión da xustiza social” para recuperar “os dereitos que a cidadanía foi perdendo nestes anos”.

Deixa unha resposta

O teu enderezo electrónico non se publicará Os campos obrigatorios están marcados con *

twenty − thirteen =

X