Luís Villares: “Non se esconda señor Feijóo, unha cidadanía valente e brava non merece un presidente covarde”

Estás aquí: Inicio » Luís Villares: “Non se esconda señor Feijóo, unha cidadanía valente e brava non merece un presidente covarde”

Luís Villares: “Non se esconda señor Feijóo, unha cidadanía valente e brava non merece un presidente covarde”

O voceiro de En Marea, Luís Villares, arrancou a súa intervención na comparecencia da conselleira de Medio Rural, Ánxeles Vázquez, dirixíndose ao presidente da Xunta, Alberto Núñez Feijóo, ao que recomendou non se esconder. “Galicia viviu un domingo negro e o seu presidente estivo escondido, igual que agora. A peor noite da historia contemporánea de Galicia foi vivida sen o acompañamento do seu presidente e do seu goberno” afirmou. “Na longa noite de lume, afundiu a Xunta, e emerxeu a xente. No domingo negro, unha vez máis, esmoreceu o estado e agromou a nación. Unha cidadanía valente e brava non merece un presidente covarde” continuou.

O voceiro de En Marea lamentou que o presidente optase por “se esconder detrás dunha conselleira que non vai poder explicar hoxe o dispositivo de emerxencias, porque non é da súa competencia”. Por todo isto, pediu a Feijóo que se comporte “como o Presidente dun País en estado de emerxencia nacional, que está de loito e compareza na sede da soberanía nacional”. Luís Villares destacou que “faltaron medios pero sobrou incompetencia”.

Villares resaltou dez preguntas ás que Feijóo debería dar resposta. A primeira delas relativa ao silencio informativo nos medios de comunicación públicos. A CRTVG lembrou “é un servizo público” pero a xente o pasado domingo tiña que se informar a través das redes sociais ou a través doutras canles xa que a CRTVG non estaba a cumprir coa súa obriga pese a que os propios profesionais pedían voluntariamente colaborar na cobertura dos lumes, pero eran rexeitados pola dirección, porque non eran precisos. “Sánchez Izquierdo debe dimitir inmediatamente como responsable directo dunha intoxicación masiva á poboación galega. Pídello En Marea, o Comité intercentros da CRTVG e a cidadanía de Galicia” declarou o voceiro de En Marea.

A segunda das preguntas polas que deberían dar explicacións sería pola imprudencia a temeraria dos mandos políticos de protección civil por non prohibir as actividades lúcidas no monte coas previsións que se tiñan o que asegurou “foi unha temeridade criminal”. A falla de mobilización de todos os efectivos persoais dispoñibles é outra dos temas que deberían ser aclarados. “Non é certo que a Xunta tivese operativos todos efectivos dispoñibles. Son ben coñecidos os 436 despedimentos de brigadistas, porque seica era xa final de tempada, e logo do 12 de outubro xa non podía haber incendios, porque o di a Xunta” denunciou Villares. Non se cubriron baixas nin vacacións polo que as equipas estaban baixo mínimos. “Non atende o señor Presidente a unha realidade: desestacionalización dos lumes: A limitación dos meses de alto risco de incendios forestais ao período estival non reflexa para nada a realidade climatolóxica de Galicia dos últimos anos, pero vostedes non o ven” salientou o voceiro de En Marea que denunciou tamén a falla de mobilización de todos os recursos materiais dispoñibles xa que por exemplo ningún dos parques comarcais das provincias de Lugo e Coruña estaban mobilizados. Tampouco se dispuña das brigadas helitransportadas da Xunta, porque non se prorrogou o tempo de contrato dos helicópteros. “Están privatizados incluso os equipos de protección individual dos bombeiros, que se alugan a unha empresa privada. A Xunta si quere intervir non ten nin equipos propios, hainos que buscar á nave dunha empresa privada, co retraso que en caso de emerxencia iso supuxo” denunciou Villares.

Outra das graves deficiencias foi a falla de medios de protección cidadá que non tiñan algo tan básico como mascarillas para á poboación. Tampouco se activaron os protocolos de evacuación, houbo unha grave descoordinación do mando único de emerxencias. A incapacidade de coordinación de medios urbanos foi abraiante na cidade de Vigo e impediu atender en tempo real unha oferta de medios dispoñibles que esta e outras cidades puxeron á disposición dun mando que non era quen de atender as emerxencias como denunciou o voceiro de En Marea. “En Lugo, había motobombas que se cruzaban polo camiño indo dun lume a outro, porque no canto de mandalas ao lume máis próximo eran enviadas ao máis lonxano. Así pasou en Friol, onde se enviaba a motobomba de Castro, mentres a de Vilalba se enviaba a Ludrio, no Concello de Castro” explicou.

“Os servizos de atención telefónica 112 e 085 estiveron colapsados toda a tarde noite do domingo, mentres a TVG botaba Land Rover e Serramoura; e a RG Galicia en Goles” proseguiu Villares apuntando tamén a ausencia das forzas e corpo de seguridade do Estado para regular o tránsito viario.

Por último, salientou tamén a necesidade de dar explicacións sobre os motivos para que non se fixeran aínda os traballos de prevención programados para o ano 2017. Así, a realidade deixaba un panorama coa maioría das casetas de vixilancia de incendios foron pechadas. As brigadas na casa ou traballando baixo mínimos. Distritos coa metade de axentes forestais dos que había fai dez anos.

A redución a 50 metros da distancia de seguridade ás vivenda, que en 2006 se establecera en 100, a redución de 50 a 30m da franxa libre de especies especialmente combustibles, o Plan Forestal de Galicia aprobado polo PP EN 1992 pretendía acadar en 2032 unhas 245.000 hectáreas de eucaliptos, o o feito de que máis do 50 por cento da superficie arborada galega son especies de crecemento rápido foron algunhas das causas sinaladas polo voceiro de En Marea para xustificar a afirmación de que estamos ante un problema estrutural.

“Esta é a política do PP: expansión desaforada das especies combustibles, abandono do rural e privatización de servizos públicos esenciais. Ese é o verdadeiro oportunismo. O domingo decepcionou coa súa incompetencia, hoxe decepciona coa súa covardía” concluíu o voceiro de En Marea.

 

Deixa unha resposta

O teu enderezo electrónico non se publicará Os campos obrigatorios están marcados con *

one × 3 =

X