Luís Villares demóstralle a Feijóo que “a maior parte das 30 medidas anunciadas onte xa están vixentes en leis que nunca se cumpriron”

Estás aquí: Inicio » Luís Villares demóstralle a Feijóo que “a maior parte das 30 medidas anunciadas onte xa están vixentes en leis que nunca se cumpriron”

Luís Villares demóstralle a Feijóo que “a maior parte das 30 medidas anunciadas onte xa están vixentes en leis que nunca se cumpriron”

O voceiro de En Marea, Luís Villares, fixo un repaso polas trinta medidas anunciadas onte polo presidente da Xunta no marco dun gran pacto forestal para combater os lumes verificando que boa parte delas xa forman parte de leis vixentes sen que o goberno galego velase nunca polo seu cumprimento. “Non lle parece raro que quen lle preparou estas medidas, o sr Fernández Couto, se limitase a recoller decisións aprobadas neste Parlamento ou decretadas pola Xunta que non se chegaron a cumprir nunca? Quen é o responsable de que estas medidas non estean executadas a día de hoxe?”, interpelou Villares a Feijóo.

“Dezaseis das trintas xa figuran en leis vixentes e non supoñen ningunha innovación, outras recuperan normas anteriores ao 2009 que vostedes mesmos derrogaron e non supoñen ningunha innovación e seis que rectifican diametralmente a política realizada ata agora” sinalou Villares, antes de indicar que no listado de medidas só hai 5 que teñen carácter novidoso. “Son unha emenda case á totalidade da súa política nas áreas forestal e agrogandeira”.

No turno de réplica o voceiro de En Marea fixo un repaso polas medidas que xa teñen a súa correspondencia en leis vixentes:

Medida 1 Colaboración Xunta-Concellos para financiar a limpeza dos montes      > Art. 59 da  Lei Prevención Defensa Incendios.

Medida 5 Facilidades para actuar nas parcelas de titular descoñecido >  Art. 12 Lei Mobilidade Terras

Medida 6 Incorporación cautelar ao Banco de Terras das parcelas con propietario descoñecido, falecido ou ilocalizable > Art 12 Lei Mobilidade Terras (conveniado coa Admon Xeral do Estado 2013)

Medida 7 Incorporación cautelar ao Banco de Terras dos montes veciñais en man común abandonados > Art. 27 da Lei de Mobilidade de Terras.

Medida 8 Mobilización das terras abandonadas para polígonos agrarios >  METAGA (Lei de Mellora de Estrutura Territorial de Galicia)

Medida 9 Faixas de protección arredor das subestacións eléctricas e estacións de telecomunicacións > art. 20 bis Lei Protección Incendios

Medida 10  Obriga de xestión da biomasa nas vivendas illadas en solo rústico aínda que estean a máis de 400 metros do monte >art. 16 da Lei de Prevención de  Incendios

Medida 13 Campaña de difusión sobre as novas medidas de prevención > PLADIGA

Medida 14 Campaña de sensibilización na educación obrigatoria >  PLADIGA

Medida 15 Participación dos grupos parlamentarios na redacción do Plan forestal Grupo Traballo xunta de galicia 2015 >  art. 74 Lei 7/2012 Montes de Galicia

Medida 16. Impulsar os plans de ordenación nos 19 distritos forestais, comezando por Ourense e Pontevedra > Art 15 da Lei 3/2007 de Incendios

Medida 17 Axudas para que todos os montes dispoñan en 2019 dun instrumento de ordenación > Lei Montes Veciñais e Man Común 1989

Medida 19. Seguir avanzando na reestruturación parcelaria, especialmente a impulsada por particulares >  Decreto 1998 // Lei Concentración Parcelaria 2001 // METAGA 2015

Medida 20 Redución do papelame necesario para as autorizacións de corta > Lei Emprendemento 2017

Nese sentido, Luís Villares apuntou a incapacidade do goberno de Feijóo de facer cumprir os decretos aprobados pola Xunta. “Pode vostede compremeterse a facer cumprir a lei? Ou depende dun pacto para facelo?”, requeriu, ademais de pedirlle que investigue “que persoas son as responsables de que todo isto non se cumprise ata agora”.

Feijóo limitouse a acusar a particulares e concellos polo incumprimento das leis, das distancias de seguridade e da limpeza do monte. “Os galegos non cumprimos a lei, os concellos din que non están capacitados para facer cumprila e na Xunta estamos desbordados”, recoñeu o presidente da Xunta, antes de apuntar que obrigará a “todos os concellos do PP a contar con brigadas municipais, se os concellos das Mareas o fixesen sería un gran avance”.

Villares volveu esixir responsabilidades políticas polo abandono do medio rural e tamén pola incompetente xestión dos incendios durante o Domingo Negro da vaga de lumes. “Cos mesmos políticos non se poden facer políticas diferentes”. Tamén lle volveu ofrecer a colaboración de En Marea para un “gran acordo de país” e con esa finalidade “En Marea e PsdeG volveron rexistrar onte nesta Cámara a solicitude de creación dunha Comisión de Estudo con expertos independentes que avalíen as causas da vaga de lumes e propoñan políticas alternativas”.

Deixa unha resposta

O teu enderezo electrónico non se publicará Os campos obrigatorios están marcados con *

9 − six =

X