Luis Villares critica o abandono da provincia de Lugo nos orzamentos da Xunta de Galicia

Estás aquí: Inicio » Luis Villares critica o abandono da provincia de Lugo nos orzamentos da Xunta de Galicia

Luis Villares critica o abandono da provincia de Lugo nos orzamentos da Xunta de Galicia

O voceiro de En Marea, Luís Villares, e a voceira de Lugonovo, Cristina Pérez Herraiz, ofreceron unha rolda de prensa esta maña para valorar os orzamentos da Xunta de Galicia 2018 para Lugo.

“Hai unha pregunta que planea por todos os orzamentos de Galicia e tamén na provincia de Lugo: se mellora a economía, por que non vivimos mellor? Se o PIB medra, por que non medran os orzamentos de forma acorde para incrementar o benestar? Que lle fixo a provincia de Lugo aos señores Feijoo e Balseiro?”. Estas foron as preguntas que lanzou Luís Villares ante uns orzamentos da Xunta que consagran “o abandono da provincia” e son tan só “propaganda e fume”.

O portavoz de En Marea fixo estas declaracións na rolda de prensa conxunta coa portavoz municipal de Lugonovo no Concello de Lugo, Cristina Pérez. Villares fiou a súa crítica arredor de cinco puntos que resumiu no “incumprimento coas infraestruturas, co benestar, co transporte, coa innovación e coa modernización e actualización da Xustiza a nivel provincial”.

“Son uns orzamentos que non teñen que ver coa marcha da economía tal como esta é anunciada polo PP. Se estamos nunha falsa alcista da economía, por que non se incrementan na mesma medida os parámetros de benestar das luguesas e lugueses?”. Luís Villares equiparou esta situación de “abandono” coa “incompetencia e incapacidade de xestión que viviu toda Galicia coa recente vaga de incendios”.

“Temos un cúmulo de promesas incumpridas que volverán selo en 2018” denunciou, lembrando que   moitas das previsións dos orzamentos do exercicio anterior “nin foron cumpridas en 2017 nin o serán en 2018”. Entre elas citou o desdobramento do corredor Nadela-Sarria “cun investimento 20 veces menor que o do ano pasado”, o eixo Begonte-Friol-Palas con 25% menos de investimento, a mellora da estrada do Courel con oito veces menos investimento do previsto. “Estas son as promesas de Feijoo en materia de infraestruturas para a provincia de Lugo? Por que teríamos que crer na previsión orzamentaria para 2018?” preguntouse.

En materia de benestar, o portavoz de En Marea sinalou unha serie de eivas e inconcrecións como a partida de escasos 91.000 euros para toda a provincia para prazas de residencias de maiores, ou garderías, coa previsión de 420 prazas en toda Galicia cando só a provincia de Lugo precisaría de 600. No Plan de Vivenda, Villares ironizou coa “lexislatura do rural” cando só hai orzamentados para rehabilitación de cascos históricos e nucleos rurais en toda a provincia 120.000 euros. “Practicamente o que custa reconstruír unha das casas que arderon nos Ancares”, exemplificou.

“Constatamos a preocupación polo 155 da Constitución, pero a min preocúpame máis o 47, o que recoñece o dereito a unha vivenda digna”, sinalou.

En canto a transportes, Luis Villares cualificou de “verdadeiro desastre” o plano da Xunta de Galicia que “está incomunicando concellos e comarcas enteiros, desvalidos á hora de articular a súa propia mobilidade”. “Algo que afecta especialmente ás persoas maiores, o que se suma ao desmantelamento do sistema sanitario en Monforte e na Mariña, onde faltando servizos nos puntos de atención continuada a xente ten que desprazarse ás cabeceiras de comarca ou á propia cidade de Lugo”. Esas persoas “notan como o plan de transporte lles impide moverse no propio día, tendo que tirar de taxi ou aloxamento”. Os “apenas 250.000 euros” que dotan o plano de transportes son “notoriamente insuficientes”e deixan “desasistido o medio rural”.

“En materia de innovación baixan os investimentos “denunciou “e esa aposta de Rozas vaise achicando apenas empezada. De feito, vemos como se gardaron moito de dar os datos reais de creación de emprego en Rozas”. Unha aposta seria “debe implicar a todos os sectores do país: universidade, empresas e administración” aseverou.

Na xustiza, cualificou a situación de “colapso xudicial” pola falta de xulgados. “Non é competencia da Xunta, pero si dotar coas ferramentas e tecnoloxías para que o sistema funcione e para a implantación da nova oficina xudicial e fiscal”. A dotación para todo o sistema na provincia en 2019 son 17.000 euros, unha “partida absolutamente ridícula porque calquera persoa relacionada coa xustiza e coa informática sabe que isto só dá para montar unha única unidade, cando temos nove instalacións xudiciais”.

Luis Villares quixo destacar unha serie de aspectos específicos dos orzamentos na provincia. Entre eles  incluiu o porto seco de Monforte, lembrando que a Xunta de Galicia “non ten un plano de infraestruturas ferroviarias para o noso país, e iso nótase nos orzamentos” cando “non hai plan para o Feve, para a transcantábrica, as liñas ferrorivarias a Coruña-Lugo e eixo Ourense-Monforte” pola “falta de posición propia, que se marca en Madrid”, indicou. “O Eixo atlántico de mercadorías non pode seguir prescindindo de Galicia a través de Lisboa-Madrid”, o que fai “ineficiente o noso sistema ferroviario” en detrimento da opción transcantábrica de mercadorías. A consecuencia práctica é o “ridículo” da previsión do porto seco de Monforte, unha “gándara onde se almacenan mercadorías entre as xestas”.

O portavoz de En Marea salientou tamén a cuestión sanitaria en Monforte cunha recente “manifestación multitudinaria en defensa da área sanitaria e os servizos”. As dotacións para modernización de infraestruturas de Monforte e Lugo sur é “insuficiente”, con apenas 300.000 euros. “Tendo en conta todas as carencias denunciadas como goteiras, falsos teitos… isto apenas chega para o mantemento esencial”. “Isto demostra unha vez máis que a reforma da lei de saúde de Galicia vai destinada a desmantelar a área sanitaria de Lugo sur” denunciou, lembrando que os orzamentos do Sergas de 2018 non prevén como cubrir as baixas e substitucións en centros como o de xeriatría de Chantada ou a atención primaria en Quiroga. No hospital da Costa da Mariña hai só unha “ampliación de camas” sen “ampliación de servizos”, indicou. “A previsión da partida deste ano, a día de hoxe, está sen executar” salientou, indicando que “tememos atopar unha desas previsións de partidas non executadas despois, ao remate do ano”.

Outras eivas dos orzamentos son, para o portavoz, “o abandono total da montaña de Lugo”, que vinculou coas declaracións da conselleira de Medio Rural no pleno do Parlamento relativos a Cervantes, “bonito para visitar pero non vivir”. “Se queren despoboar forzosamente a montaña de Lugo que o digan”, retou, “porque nós cremos que a xente ten dereito a vivir dignamente onde sexa, con acceso a servizos”. “Estes orzamentos desprezan á poboación da montaña de Lugo”, resumiu.

Lumes en Galicia
A respecto da recente vaga de lumes, denunciou a ausencia de “partidas específicas para accións no monte, para revitalizar as comunidades de montes, ou para accións de carácter agrogandeiro para recuperar terras agrarias”. Tampouco se prevé unha “mellora nos servizos de prevención e extinción, nin na súa desestacionalización”.

Luís Villares salientou que nos incendios en Galicia “asistimos a unha incompetencia que se disfraza de inimigo exterior”, xa que “as causas son múltiples e só unha delas os incendiarios”. “O inimigo exterior só vive na cabeza do señor Feijoo, incapaz de prever unha ordeación do monte e do territorio e un medio rural vivo capaz de conter os incendios”. “A Fiscalía do Medio Ambiente continuamente di que en 35 anos nunca en Galicia se descubriu ningún tipo de trama incendiaria”, lembrou.

“O monte arde cando se dan as condicións” indicou “e precisamos un gran pacto nacional polo territorio que as limite”. Villares resumiu esta proposta na “aposta por un rural vivo e con servizos que fixe a poboación”, unha “política forestal distinta que non cre grandes masas de combustíbel incontrolables”, a revisión da política de franxas de seguridade “que o PP reduciu, no caso do eucalipto, de 100 a 50 metros entre plantación e casas”, e o aproveitamento do sotobosque e pastos e forraxes no marco dunha nova política agropecuaria que recupere terras agrarias que foron forestadas, entre outros.

A Xunta despreza á cidade de Lugo
Pola súa banda, Cristina Pérez lamentou que os orzamentos “son o reflexo do descoñecemento absoluto que a Xunta ten das necesidades dos e das lucenses, a mostra de que xestiona de costas á realidade local e, o que é peor, sen ánimo ningún de corrixir o rumbo”.

“Contías que, no caso do Concello, de tan escasas, chegan a rozar o ridículo para proxectos moi relevantes como o interminable Plan Paradai, o espellismo da Estación Intermodal ou mesmo o colexio do Sagrado Corazón. Infraestruturas de primeiro nivel, que ano tras ano a Xunta ningunea demostrando que a nosa, é para eles,  unha cidade de segunda”, afeou a portavoz municipal.

“Sen embargo, o mellor botón de toda a mostra é o feito de que unha das asignacións máis avultadas se cualifique como investimento cando vai ser a veciñanza quen, do seu peto, asuma a dotación do novo Auditorio. Unha extorsión da Xunta, acatada pola alcaldesa,  – conclúe a voceira de Lugonovo –  á que agora xa só se lle pode chamar burla”.

Deixa unha resposta

O teu enderezo electrónico non se publicará Os campos obrigatorios están marcados con *

5 + nineteen =

X