Luís Villares asegura que estamos ante “o Goberno do abandono” e reclama un pacto polo territorio que dea solución ao problema dos lumes

Estás aquí: Inicio » Luís Villares asegura que estamos ante “o Goberno do abandono” e reclama un pacto polo territorio que dea solución ao problema dos lumes

Luís Villares asegura que estamos ante “o Goberno do abandono” e reclama un pacto polo territorio que dea solución ao problema dos lumes

O voceiro de En Marea, Luís Villares, denunciou a “incapacidade estrutural” da Xunta de Galicia que quedou acreditada nas últimas semanas na xestión da vaga de lumes tanto no domingo negro como nas semanas posteriores. “Estamos ante un Goberno do abandono que no relativo o medio rural amosouse de xeito descarnado nas últimas semanas” afirmou Villares. En Marea está a desenvolver nas últimas semanas un traballo exhaustivo de seguimento do que se está a facer nos concellos máis afectados e “os resultados son desesperanzadores” lamentou o voceiro de En Marea. “Temos unha sociedade civil viva que quere saír adiante, uns Concellos que están a axudar pero unha Xunta de Galicia que non fai máis que poñer paos nas rodas” afirmou.

O abandono é transversal e en distintos niveis como salientou Villares. Así sinalou o grave risco de viabilidade que están a vivir explotacións gandeiras que concellos como Cervantes ou Ponte Caldelas denunciaron xa que o Goberno galego non está a dar facilidades para poñer en contacto ao aqueles que lugares que teñen excedentes de herba e gandeiros afectados. Foron os propios concellos e entidades os que tiveron que asumir esta labor o que demostra que “a Xunta non acaba de entender que é preciso unha resposta inmediata”. O mesmo acontece no relativo á rexeneración do chan e establecemento de medidas de fixación do chan o que coas choivas dos últimos días está a poñer en risco a rexeneración do monte, provocar a contaminación dos ríos que pode chegar ás rías.

Villares denunciou así mesmo que a Xunta non está a verificar a contaminación dos acuíferos dos que dependen moitos municipios e vilas, e son os propios Concellos os que o están a facer. En lugares como Carballeda de Avia por exemplo o subministro regular tense que facer mediante camións ou auga embotellada.

Outras das denuncias que os Concellos trasladaron a En Marea fai referencia aos retrasos dos permisos dos técnicos veterinarios da Xunta que superaron en algún caso á semana, para poder retirar os cadáveres dos animais calcinados o que supón un verdadeiro problema de saúde pública.

Unha denuncia constante entre todos os afectados fai referencia aos recursos existentes que nalgúns lugares provocou que non se puidera declarar o nivel 2 de alerta simplemente porque os mandos de emerxencias non foron quen de estruturar os mandos para avaliar a situación. Denuncia de falla de medios que había dispoñibles en outras áreas pero incapacidade da Xunta de coordinar os efectivos provocou que non puideran saír. Por este motivo, unha vez máis En Marea salienta a necesidade de establecer un mando único que acabe con esta descoordinación intolerable.

A atención psicolóxica para as persoas afectadas que En Marea leva semanas reclamando continúa sen ser atendida por parte do Goberno galego, unha atención que precisan tanto as persoas que perderon todo como os propios profesionais que viviron situacións dramáticas e que están a ver como a non contan co respaldo dunha atención especializada por parte da Administración.

No relativo a ás axudas, o voceiro de En Marea volveu insistir na denuncia formulada o día da publicación do Decreto e que agora vese corroborada e ampliada pola posta en práctica do mesmo. A indeterminación das contías, o condicionamento a chegar a convenios entre Concellos e Xunta e a inasumible burocracia imposta no Decreto dificultará de xeito importante o pagamento destas axudas. Desde En Marea insisten na necesidade de abrir oficinas en todos os concellos afectados, non só en Cervantes como anunciou Rueda a pasada semana, senón chegar a todos de xeito que a cidadanía poda atopar a axuda necesaria para tramitar estas axudas.

Piden ademais a eliminación de determinados requisitos que pola súa dificultade provocarán que só se poda atender a menos dun 2 por cento das persoas que poderían acollerse a estas axudas. “Estamos unha vez máis ante a propaganda do PP que á hora da verdade non se traslada a realidade e deixa sen atender ás persoas afectadas” declarou Villares.

Os Concellos denuncian así mesmo que non teñen sistematizada unha resposta conxunta por parte da Xunta de Galicia para dar resposta as preguntas e demandas dos municipios xa que non existe unha oficina técnica que poda atender esta peticións.

O prazo dado para a solicitude das axudas é outra das cuestións que En Marea considera preciso anular de xeito inmediato xa que polos propios requisitos que se están a esixir supón un prazo insuficiente.

No relativo ás axudas persoais, o voceiro de En Marea denunciou o emprego demagóxico que o Goberno galego fixo e está a facer do termo “terrorismo incendiario” co que tenta agochar a súa responsabilidade pero que a hora de trasladar ás contías das axudas fai recolle coa obriga de demostrar que os lumes foron intencionados. “O goberno anunciou que subía indemnizacións ao ser considerados como terrorismo pero a realidade é outra e as disposición non contemplan as partidas de indemnización por terrorismo. Se está a facer demagoxia con este termo, investindo 80.000 euros en medios de comunicación para facer propaganda deste suposto terrorismo incendiario” engadiu.

O voceiro de En Marea fixo referencia á negativa da Xunta a permitir que os Concellos contraten técnicos para planificar unha recuperación integral das zonas queimadas. Concellos como As neves onde a situación levou á banca rota as empresas afectadas, non se lles está a permitir que teñan ningún tipo de iniciativa para a recuperación económica do municipio e a diversificación económica. Algo que tampouco está a facer o Goberno galego co que “nin fan nin deixan facer”.

Por último, Luís Villares, fixo referencia a negativa do PP no Parlamento para crear unha comisión de estudo formada por expertos e profesionais independentes para determinar causas reais e propor alternativas realistas e asumibles. Todos os expertos están a advertir de que estamos ante un problema estrutural que require dun pacto nacional polo territorio que permita arranxar a situación e avanzar nun cambio de modelo. “Se nos limitamos a botar culpa a un inimigo exterior que ninguén viu, ve nin verá, non lograremos dar solución ao problema e será determinante para o noso futuro” concluíu o voceiro de En Marea.

Deixa unha resposta

O teu enderezo electrónico non se publicará Os campos obrigatorios están marcados con *

18 − fourteen =

X