O Consello das Mareas decidiu nesta mañá de 13 de febreiro por maioría votar NON aos Orzamentos Xerais do Estado.

As razóns desta negativa son a falta de compromiso orzamentario nos investimentos coas necesidades económicas, ambientais e sociais de Galicia, e a falta de vontade negociadora para a súa modificación durante a tramitación parlamentaria.

En Marea constatou unha falta de vontade real de acadar un acordo por parte do goberno ao non atender nin unha soa das demandas de En Marea recollidas na Axenda Galega do cambio. A ausencia de calquera garantía de acordo antes ou durante o debate de totalidade permítenos concluír que o PSOE non tiña vontade real de comprometerse cos investimentos necesarios para a xeración de emprego e riqueza en Galicia.

En Marea ten un compromiso firme e decidido coa cidadanía galega e polo tanto pedirá a devolución duns orzamentos inaceptables para Galicia en termos de investimento.

O Partido Socialista non comprendeu que a formulación dunha maioría progresista no Congreso tras a moción de censura require gobernar tendo en conta a pluralidade parlamentaria, e comportouse durante a tramitación orzamentaria como se tivese unha maioría da que non dispón, sen escoitar as lexítimas demandas de forzas políticas que como En Marea, buscabamos mellorar a calidade de vida da xente.