Todas as deputadas firmaron unha declaración na que se comprometían a actuar “sempre no nome de En Marea e en ningún caso representando intereses diferentes”

Santiago de Compostela, 17 de xuño de 2019. O Consello das Mareas e a coordinadora de En Marea consideran que unha parte das deputadas do grupo parlamentario autonómico está “incumprindo gravemente” o acordo que cada unha delas asinou en setembro de 2016 no que se comprometían a “actuar sempre no nome de En Marea e en ningún caso representando intereses diferentes”. Desde a dirección de En Marea sinalan que este acordo segue vixente e que as últimas declaracións do secretario xeral de Podemos Galicia, Antón Gómez Reino, supoñen unha práctica transfuga ao actuar dentro de En Marea ao servizo de intereses alleos. En Marea reclama, unha vez máis, que se cumpran os acordos firmados e que se desenvolvan as directrices fixadas polo Consello das Mareas.

Segundo declarou Gómez Reino as deputadas de En Marea inscritas en Podemos apoiarán unha proposta distinta a acordada por En Marea á hora de escoller á persoa para ir ao Senado. Ademais de romper co acordo de 2016, Reino explica tamén que estás deputadas traballarán a partir de agora nun proxecto político diferente que non é aquel polo que foron escollidos e polo que recibiron os votos o que, na práctica, supón unha nova modalidade de transfuguismo ao traballar desde o proxecto político que tentaron dinamitar a favor de outro.

Texto do documento firmado polas deputadas de En Marea

COMPROMISO PERSOAL DOS CARGOS DE EN MAREA

Como cargo orgánico e/ou institucional de En Marea comprométome a:

• Aceptar os principios básicos e os documentos de forma de goberno e de organización interna da Marea Constituínte, aprobados o 30 de xullo de 2016
• Asumir e acatar o código ético como conxunto de boas prácticas a desenvolver, nomeadamente os seguintes puntos:

1. En exercizo do cargo de este espazo actuarei sempre no nome de En Marea e en ningún caso representando intereses diferentes.
2. Defender publicamente o proxecto político, desenvolvendo os principios básicos e o programa.
3. Actuar segundo os principios de igualdade, horizontalidade e transversalidade, respectando o funcionamento colexiado.
4. Empregar a lingua galega nas miñas intervencións públicas, na oral e na escrita, tanto a nivel institucional como nos espazos orgánicos.
5. Acatar as resolucións do Comité de Ética e Garantías

Por todo o anterior, subscribo este compromiso en liberdade, entendendo todas as cláusulas que se sinalan e asumindo a súa defensa.

DNI e sinatura: