Desde a Marea Feminista desexamos un 2018 sen violencias machistas

Estás aquí: Inicio » Desde a Marea Feminista desexamos un 2018 sen violencias machistas

Desde a Marea Feminista desexamos un 2018 sen violencias machistas

Hoxe, último día do 2017, a nova do día é a aparición do cadáver de Diana Quer (desaparecida en agosto de 2016 na Pobra do Caramiñal). Outra muller asasinada, outra vítima da violencia machista.

Durante os 500 días de busca, de Diana Quer díxose en non poucos medios que era unha fresca, que se fiaba de mozos que coñecía por Internet, que tiña comportamentos “problemáticos”…. en resumo: que a culpa fora súa.
Ningunha das mulleres asasinadas o sería sen a complicidade dun machismo que cando non ataca ás mulleres, garda silencio.

Non podemos ser cómplices disto. Non nos resignamos. Desde a Marea Feminista, ao longo deste ano en numerosas ocasións manifestamos que a expresión máis atroz da violencia machista son os asasinatos, pero son so a punta do iceberg: hai moitas condutas, accións, omisións, etc. que tamén son violencia machista. Cómpre sensibilizar á mocidade, aos medios de comunicación, aos/ás profesionais de diverso ámbito implicados/as, á sociedade en xeral… para detectar estas condutas, accións, etc. antes de que sexa tarde, para previr e intervir, para non lamentar máis asasinatos.

Non é de recibo que se culpabilice ás vítimas por ir soas de noite, por levar saias curtas, por non ter denunciado… A pasividade social, culpabilizar ás vítimas, o silencio… fomentan o machismo, e na súa máxima expresión, o asasinato, ao amosar certa “impunidade” dos “presuntos asasinos”, xa que a culpa é delas”…

Desde a Marea Feminista seguiremos loitando por políticas eficaces de prevención da violencia machista, por poñer os medios e recursos suficientes para facerlle fronte ao terrorismo machista, etc. Desexamos que o ano 2018 sexa o ano no que se remate coa violencia machista, por iso, seguiremos esixindo:

  • A dotación de recursos reais por parte da administración.
  • O desenvolvemento e o cumprimento de tódolos puntos da Lei 11/2007, de 27 de xullo, Galega para a prevención e o tratamento integral da violencia de xénero.
  • Integrar a coeducacion nos centros de ensino (ampliando os contidos mínimos relacionados coa igualdade e a prevención das violencias machistas e incorporando a perspectiva de xénero nos plans de estudo).
  •  Formación en igualdade -obrigatoria e especifica- para o conxunto de profesionais implicados e que interveñan no proceso educativo, xudicial, etc. (docentes, xudicatura, forzas de seguridade …).
  • Desenvolver e levar a cabo protocolos de actuación interdepartamental e interinstitucional para a coordinación e mellora das actuacións.

As actitudes machistas forman parte do cotiá, están presentes cada día, en tódalas esferas das nosas vidas, por iso desde a Marea Feminista non cesaremos na sensibilización, a loita, a denuncia….
Por un 2018 sen violencias machistas. Queremonos vivas e libres!!

Deixa unha resposta

O teu enderezo electrónico non se publicará Os campos obrigatorios están marcados con *

five + six =

X